أعلنت محافظة الدقهلية عبر صفحاتها الرسمية، أمس الإثنين، الانتهاء من توزيع الملصقات الخاصة بالتسعيرة الجديدة على مركبات النقل الجماعي والميكروباصات في مواقف طلخا، عقب قرار رفع أسعار الوقود الأخير.
ورغم هذا الإعلان، كشف عدد كبير من السائقين أنهم لم يتسلموا أي ملصقات رسمية حتى الآن، مما اضطر بعضهم إلى طباعة التسعيرة يدويًا وتعليقها داخل سياراتهم لتفادي الدخول في مشادات يومية مع الركاب.
وسادت حالة من الارتباك في مواقف طلخا والمنصورة نتيجة عدم وجود ملصقات بالتسعيرة الرسمية على سيارات الميكروباص، مما أدى إلى خلافات يومية بين السائقين والركاب حول قيمة الأجرة.
غياب توزيع الملصقات
وقال أحمد السيد، سائق على خط جديلة - طلخا: "حتى الآن لم أستلم أي ملصقات من ضابط المرور، مما يعرضني لخلافات يومية مع الركاب بسبب عدم اقتناعهم بالتسعيرة الجديدة، خصوصًا مع غياب أي مستند رسمي معتمد".
وأضاف: "الناس بتسألنا كل يوم عن الأجرة الجديدة، فاضطرينا نطبع ورقة على حسابنا ونكتب فيها التسعيرة ونلصقها قدام الركاب، بس برضه بيتقال إنها مش رسمية، ومش بنقدر نقنع كل الناس بالكلام".
أما رمضان عبد اللطيف، سائق على خط الجامعة – طلخا، أوضح أن هذه الأزمة ليست جديدة، بل تتكرر مع كل زيادة في أسعار الوقود: "نسمع إن التسعيرة جاهزة والملصقات اتوزعت، لكن فعليًا مفيش حاجة بتوصل لنا، محتاجين توزيع حقيقي على الأرض مش بس بيانات، لازم يكون معانا مستند رسمي عشان الركاب".
وأشار خالد ناصر، سائق خط طلخا - سندوب، إلى تفاوت التجربة بين السائقين: "فيه عربيات استلمت الملصقات، وفيه عربيات لسه مستلمتش، إحنا من أول يوم طبقنا الزيادة اللي أعلنوا عنها، بس المشكلة مش في السائقين، المشكلة إن مفيش توحيد واضح لطريقة إعلان الأجرة، وده بيخلي كل واحد يتصرف بطريقته".
وأعلنت لجنة التسعير التلقائي للمواد البترولية في 11 أبريل الماضي، تحريك أسعار المحروقات، لذا ارتفع سعر بنزين 95 إلى 19 جنيهًا للتر بدلًا من 17 جنيهًا، وبلغ سعر بنزين 92 نحو 17.25 جنيهًا للتر بدلًا من 15.25 جنيهًا، بينما سجل بنزين 80 زيادة ليصل إلى 15.75 جنيهًا للتر مقارنة بـ13.75 جنيهًا سابقًا.
ركاب في حيرة بين الأسعار
وسادت حالة من الارتباك بين الركاب في ظل اختلاف قيمة الأجرة من سيارة إلى أخرى، وعدم وضوح الأسعار الرسمية في غالبية المواقف.
وقالت نهى عبدالفتاح، موظفة: "الأجرة مش موحدة، كل ميكروباص بيقول رقم مختلف، لو الحكومة قررت رسميًا الزيادة، المفروض يبقى فيه ملصقات واضحة ومطبوعة على كل العربيات، دلوقتي بنشوف عربيات عليها أوراق مطبوعة بخط اليد، وعربيات مفيهاش حاجة خالص، فإحنا مش عارفين نصدق مين".
وأاضافت: "فيه ركاب بيدفعوا أكتر من المفروض، وفيه ناس بتتخانق مع السواقين بسبب نص جنيه أو جنيه فرق، الموضوع محتاج رقابة حقيقية مش بس تعليمات".
